«Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանի շնորհավորական ուղերձը Շրջակա միջավայրի համաշխարհային օրվա և ՀՀ բնապահպանի օրվա կապակցությամբ
05/06/2025
Սիրելի՛ գործընկերներ և քաղաքացիներ, այսօր բնապահպանական հանրությունը նշում է Շրջակա միջավայրի համաշխարհային օրը և այն կարևոր առիթ է հիշեցնելու մեզ այն պատասխանատվության մասին, որն ունենք մեր մոլորակի ու հայրենի բնության նկատմամբ։
Այսօր, երբ կլիմայական փոփոխություններն ու բնապահպանական մարտահրավերները գլոբալ և տեղական մակարդակներում նոր թափով են զարգանում, հատկապես կարևորվում է կանխարգելման, մոնիթորինգի և կայուն զարգացման սկզբունքների վրա հիմնված պետական քաղաքականության իրականացումը։
ՇՄՆ «Հիդրոօդերևութաբանության և մոնիթորինգի կենտրոն» ՊՈԱԿ-ը, որպես շրջակա միջավայրի տարրերի մոնիթորինգի ոլորտում առաջատար կառույց, տարիներ շարունակ իրականացնում է հիդրոօդերևութաբանական, մթնոլորտային օդի, մակերևութային և ստորերկրյա ջրերի, հողի, կլիմայի և էկոհամակարգերի վիճակի մշտադիտարկում, վերլուծություն ու կանխատեսում։ Մեր գիտականորեն հիմնավորված տվյալներն ու վերլուծությունները հիմք են հանդիսանում պետական քաղաքականության մշակման ու կայուն բնօգտագործման համար։
Բնությունը մեր տունն է, մեր ժառանգությունն ու ապագան։ Մենք բոլորս միասին ենք կրում նրա պահպանման պատասխանատվությունը՝ յուրաքանչյուր փոքր քայլ կարևոր է՝ լինի դա ջրի խնայողություն, կենցաղային թափոնների զսպված կառավարում, թե պարզապես հետաքրքրություն բնապահպանական կրթության նկատմամբ։
Այս նշանակալի օրվա կապակցությամբ խորին շնորհակալությունն եմ հայտնում բոլոր այն մարդկանց, որոնք իրենց աշխատանքով, սկզբունքայնությամբ և հավատով ծառայություն են մատուցում բնության պահպանությանը՝ սկսած ոլորտի մասնագետներից մինչև ակտիվ քաղաքացիներ։
Թող այս օրը դառնա ոգեշնչման նոր աղբյուր՝ բնության հանդեպ հոգածություն ցուցաբերելու և հաջորդ սերունդներին առողջ ու կենսունակ միջավայր փոխանցելու պարտավորությամբ։
Պահպանենք բնությունը՝ պահպանելով ապագան։ Մաղթում եմ բոլորիդ խաղաղ երկինք, մաքուր օդ, առողջ բնություն և համագործակցություն՝ հանուն կայուն ու կանաչ ապագայի։
