Սեպտեմբերի 18-ը՝ Ջրի մոնիթորինգի համաշխարհային օր

18/09/2025

Բնապահպանական այս տոնը հիմնվել է 2003 թվականին՝ Մաքուր ջրի ամերիկյան հիմնադրամի կողմից։ Նպատակն է ընդգծել ջրի մոնիթորինգի դերը՝ որպես ջրային ռեսուրսների պահպանության, կայուն կառավարման և հասարակության իրազեկվածության բարձրացման կարևոր գործիք։

Պատմական ակնարկ

Հայաստանում ջրային ռեսուրսների ուսումնասիրությունն ունի ավելի քան մեկուկես դար պատմություն․

• 1856 թ․ կատարվել են առաջին հիդրոլոգիական ուսումնասիրությունները Սևանա լճի ավազանում,
• 1904 թ․ բացվել է առաջին հիդրոլոգիական դիտակետը՝ Փամբակ գետի վրա,
• 1944 թ․ մեկնարկել են ստորերկրյա ջրերի համաչափ և պլանային ռեժիմային դիտարկումները,
• 1947 թ․ բացվել են մակերևութային ջրերի որակի մոնիթորինգի առաջին դիտակետերը Վարդենիս, Դեբեդ, Գավառագետ, Ձկնագետ և Արգիճի գետերում։

Այսօր ջրային ռեսուրսների որակական և քանակական մոնիթորինգն իրականացնում է «Հիդրոօդերևութաբանության և մոնիթորինգի կենտրոն» ՊՈԱԿ-ը։ Մոնիթորինգի միջոցով․

• դիտարկվում և գնահատվում են մակերևութային և ստորերկրյա ջրերի ռեսուրսները և դրանց փոփոխությունները, ուսումնասիրվում է ջրի որակը և անտրոպոգեն ազդեցությունը,
• ստացված տվյալները դառնում են հիմք՝ ջրային ռեսուրսների արդյունավետ կառավարման և կայուն քաղաքականության մշակման համար։

Մեր մասնագետների հետևողական աշխատանքի շնորհիվ հանրությանը մատուցվում է վստահելի և ճշգրիտ տեղեկատվություն, որն ապահովում է ինչպես գիտական վերլուծությունների, այնպես էլ գործնական կառավարման համար անհրաժեշտ հիմք։

Շնորհավորում ենք ոլորտի նվիրված մասնագետներին և շնորհակալություն հայտնում նրանց կատարած պատասխանատու աշխատանքի համար։ Միաժամանակ բոլորիս կոչ ենք անում խնայել ջուրը, պահպանել դրա մաքրությունը և միասին պաշտպանել մեր ամենաթանկ բնական ռեսուրսը։