28/08/2023
ՇՄՆ «Հիդրոօդերևութաբանության և մոնիթրինգի կենտրոն» ՊՈԱԿ-ի Օրհուս կենտրոնի և «Դալմա-Սոնա» հիմնադրամի համատեղ նախաձեռնությամբ օգոստոսի 26-ին Երևանյան լճի ափամերձ հատվածներում իրականացվեց աղբահավաքություն՝ «Մաքուր խաղեր» ձևաչափով։
Աղբահավաքության կազմակերպիչները նախապես մասնակիցներին ներկայացրեցին շրջակա միջավայրի վրա թափոնների ազդեցության հետևանքները, Հրազդան գետի և Երևանյան լճի աղտոտվածության հիմնախնդիրները և խաղի կանոնները։
«Մաքուր խաղերը» միջազգային խաղ է, որը լայն կիրառելիություն ունի տարբեր երկներում: Դրա հիմնական մեխանիզմը մրցակցությունն է։ Խաղի ընթացքում մասնակիցները բաժանվում են թիմերի, միավորներ են ստանում հավաքած աղբի, էլ ավելի շատ միավորներ՝ տեսակավորված աղբի համար: Խաղի իմաստը աղբը՝ որպես արժեքավոր ռեսուրս դիտարկելն է:
Խաղն անցավ հետաքրքիր մրցակցային մթնոլորտում։ Հաղթող թիմերն արժանացան մրցանակների։ Միջոցառման 14 մասնակիցների կողմից հավաքվեց 32 տոպրակ աղբ, մասնակիցները ներկայացրեցին նաև հատուկ գտածոներ, որոնց շուրջ հորինեցին և պատմեցին պատմություններ։
